Møre-Nytt står sterkt i lokalsamfunnet. Ørstingane har alltid vore stolte av lokalavisa si, og vi som jobbar der kjenner ansvaret med å forvalte arven.

Vi veit og at mange lesarar ikkje likar at dei vert tvinga til å endre avisvanane sine. 

Medan andre aviser har gått ned frå tre til to utgjevingar i veka, har Møre-Nytt venta. Men i 2019 fann vi ut av tida var mogen for å ta steget.

Før sommarferien gjekk redaktøren i Møre-Nytt ut med denne meldinga til lesarane:

«Verda endrar seg. Vi kan late som ingenting og håpe det går over, eller vi kan førebu oss for framtida.

Det er ikkje til å kome frå at dei som les aviser på nett vert stadig fleire, medan dei som berre les aviser på papir vert færre. Utviklinga skjer sakte, men sikkert. Det må vi innrette oss etter.

Møre-Nytt er ikkje lenger berre papiravisa Møre-Nytt. Over 1000 av våre abonnentar har droppa papirutgåva, og les avisa på mobilen eller datamaskina. Dessutan har vi nettavisa morenytt.no, der vi legg ut sakene og nyheitene når dei er ferske. 

Vi veit godt at mange framleis berre vil ha den gode gamle papirutgåva av Møre-Nytt, og det skal dei få. Papiravisene har vist seg langt meir slitesterke enn det dei digitale forståsegpåarane trudde, og papirutgåva vil vere mediehuset Møre-Nytt sitt flaggskip ei god stund til. 

Men vi gjer ei endring, og kjem til å gi ut papiravisa to gonger i veka, og ikkje tre. Det er viktig å for oss å få fram at tilbodet til abonnentane ikkje vert dårlegare når vi gir ut avis to gonger i veka, i staden for tre. Tvert om: Innsparingar på trykking og distribusjon skal vi bruke til journalistikk, slik at det vert eit betre samla tilbod på nett og papir. Dermed kan vi og forsvare at abonnementsprisen ikkje vert endra.

Vi lovar ei fyldigare papiravis to gongar i veka, tysdagar og fredagar. Dessutan skal vi satse meir på det digitale tilbodet gjennom nettavisa morenytt.no. 

Verda forandrar seg. Det må også Møre-Nytt gjere. Vi gjer det for å stå endå betre rusta til å møte framtida, slik at Møre-Nytt skal vere der også for dei komande generasjonar.»

Frå tre til to

Sidan det har vore vanleg med to aviser i veka i sommarferien vart endringa først merkbar etter ferien. Det har kome ein del klager frå eldre lesarar, med i hovudsak har lesarane akseptert endringa. Det var heller ingen dramatiske utslag på opplaget.

Redaksjonen la seg i selen for å halde lovnaden om fyldigare avis, forsterka med auka frilansbruk. 

Fasiten ved årsskiftet viste at vi leverte like mange avissider i 2019 som i 2018. Samstundes har vi auka talet på publiserte saker på nett. På slutten av året låg plusslesinga på eit nivå som er tre gongar høgre enn ved inngangen til året. Dei totale lesartala på nett for heile året var 29 prosent høgare enn i 2018. Men samanlikna med andre aviser i konsernet er det ei framleis ei solid oppside når det gjeld lesing på nett.

Nysatsingar

Omlegginga frå tre til to papiraviser, og auka nettpublisering, har prega året. Vi har såleis ikkje hatt høve til så mange nysatsingar, men det kan nemnast at vi i desember hadde ein adventskalender med eit nytt miniportrett kvar dag. 24 personar med bakgrunn frå 24 ulike land, alle busette i vårt dekningsområde, fortalde om sitt forhold til jula. Samla sett vart dette eit vitnebyrd om mangfald og at vi er meir like enn ulike. Kalenderen «Mi jul» var laga av frilansar Oddhild Harman, og fekk mange gode tilbakemeldingar.

Les: – Mi første julefeiring var her i Noreg

Konkurransesituasjonen

Møre-Nytt er i eit direkte konkurranseforhold med Møre, som kjem ut i Volda. Møre kjem framleis ut tre dagar i veka, og dette har dei brukt i ei offensiv marknadsføring i Ørsta.

Møre-Nytt på si side har tru på sin strategi om å vere først og best, og våre slagord: Nummer ein i Ørsta- Volda og More nytt.no- nettavisa for Ørsta-Volda.

Kva er den viktigaste presseetiske diskusjonen de har hatt internt i 2019?

Viser her til utgreiinga over om innhenting av tilsvar/ samtidig imøtegåelse. Her har redaktøren altså stramma inn praksis i saker med høgt konfliktnivå. I praksis betyr det at vi vil vere påpasselege med å kontakte alle partar som kan kan tenkjast å kjenne seg angripne av ein artikkel, sjølv om dei strengt tatt ikkje ville hatt krav på samtidig imøtegåelse. Ei lokalavis skal ikkje vere redd for å skrive om konflikter, men samstundes bør vi ikkje skape unødige konflikter gjennom måten vi arbeider på.

Kva for retningsliner følger ein i redaksjonen for avpublisering av saker som er tilgjengeleg digitalt?

Her er det ingen klare retningsliner. Det har vore nokre få tilfelle der saker er midlertidig avpublisert etter påstandar om faktafeil, eller der intervjuobjekt har meint seg feilsitert. Vi har også avpublisert bilete som er brukte som illustrasjonsbilete, fordi lesarar eller involverte har peika på biletet av ulike årsaker er upassande. Vi har også avpublisert saker på vår heimeside på Facebook, fordi det har kome grenseoverskridande kommentarar.

Sosiale medium er i aukande grad viktige både som kjelder og som publiseringskanalar for redaktørstyrte medier. Kva for særlege utfordringar representerer dette?

Det er ingen tvil om at sosiale medium representerer eit stort tilfang av kjelder. Hovudregelen vår er at vi kontaktar folk og ber om løyve til å gjengi ytringar, dersom det skal brukast fullt namn.  Det same gjeld bilete. Vi kan ikkje gjengi bilete, utan av bruk er avtalt, eller at fotografen har opna for bruk gjennom å dele bilete på ein av avisa sine kontoar i sosiale medium.

Vi legg ut mange av våre saker på Møre-Nytt si Facebook-side, og dette fungerer som salsplakat. Det er og ein fin måte å skape debatt rundt sakene på, og det er mange gode og friske debattar og kommentarar. 

Vi må passe på at det ikkje skjer overtramp i kommentarfelta og det kan vere utfordrande. Av erfaring veit vi at det er nokre saker som lett fører til overtramp i kommentarfelta, og vi let då vere å legge ut sakene. Det er eit dilemma sidan det kan vere saker som er viktige å nå ut med, slik som saker knytt til innvandring, også positive saker. 

Svein Aam, ansvarleg redaktør