Sunnmøringen si samfunnsrolle er å løfte fram viktige, lokale saker. Vi skal både synleggjere alt det positive som skjer lokalt, og ha eit kritisk blikk på det som er mindre bra.

Sunnmøringen har i 2018 hatt kontinuerleg fokus på offentleg forvaltning, og har publisert fleire saker etter i utgangspunktet fått avslag på innsyn i dokument. Innsyn i offentleg forvalting er eit fokusområde for Sunnmøringen, og vi har som tidlegare år klaga inn Stranda kommune inn for Fylkesmannen for manglande dokumentinnsyn. Ingen av sakene er per tidspunkt avklarte. 

Nytt i 2018 er at vi valde å klage Stranda kommune inn for Sivilombodsmannen, då vi opplever Fylkesmannen i Møre og Romsdal si handtering av innsynsklager som lite tilfredsstillande. Lang sakshandsamingstid er hovudårsaka.

Gjennom året har vi tatt opp ulike kontroversielle saker, som vi har fått tilbakemeldingar på–både av positiv og negativ art. Sunnmøringen opererer i eit avgrensa dekningsområde, der alle kjenner alle. Men det skal ikkje hindre oss frå å skrive om saker som ikkje berre viser glansbiletet av Stranda-samfunnet. Det vi skal passe på, og ha kontinuerleg fokus på, er korleis vi omtaler kontroversielle saker.

Sunnmøringen sitt samfunnsoppdrag er å vere pådrivar og synleggjerar for lokalt engasjement, men òg å vere lokal vaktbikkje. Vi har i prinsippet ikkje ei grense for kva vi kan omtale–men vi skal vere svært påpasselege med korleis vi omtaler.

Sunnmøringen har eit sterkt etisk fokus og vi er nøye med å tilby samtidig imøtegåing og tilsvar jamfør Ver varsam-plakaten si fråsegn i punkt 4.14 og 4.15. Vi er samtidig svært merksame på at vi fjernar identifikasjonsmarkørar i rettsreferat.

Det er ei rekkje menneske i dei fire bygdelaga i Stranda kommune som gjer ein uvurderleg innsats for lokalsamfunnet. Vi har gjennom året løfta fram fleire døme på slik frivillig innsats–mellom anna innsatsen til Stranda sentrumsforeining, engasjementet til ulike eldsjeler og lag/organisasjonar. Vi er sjølvsagt på plass når det er Hellesyltdagar, Strandalaurdag og andre arrangement rundt om i bygdelaga. Utdelinga av Frivilligprisen i Stranda får brei omtale i Sunnmøringen.
I 2018 har vi hatt kontinuerleg fokus på næringslivet, som tidlegare. Næringslivet i Stranda gjer det bra, og næringslivsjournalistikk er noko våre lesarar set pris på. Vi har hatt fleire reportasjar frå lokale verksemder i Stranda, og har opplevd gode tilbakemeldingar og stort engasjement spesielt på nett rundt desse reportasjane. 

Flakk-gruppa sine hotellplanar på Hellesylt er eit konkret døme på ein sak som skapte stort engasjement. I samband med planane for nytt hotell i Hellesylt vart det klart at det i planane inngår at gamle Grand hotell skal rivast, noko som førte til mange engasjerte lesarinnlegg i Sunnmøringen.

Frå nett til papir

Det er ingen grunn til å leggje skjul på at Sunnmøringen i 2018 hadde ein utfordrande situasjon, i og med at vi gjekk med underbemanning store delar av året. Fokuset gjekk av denne grunn frå nett til avis, noko som har gitt utslag på nett-trafikken på nettavisa.

På den andre sida auka vi talet på produserte avissider i fjor, og med ei forbetring i forholdstalet mellom annonsar og redaksjonell tekst. Annonsemengda har auka, og vi har samtidig opplevd ei auke i talet på abonnentar.

Grunnen til dette, er at vi trass bemanningssituasjonen har klart å levere relevant og god journalistikk til våre lesarar. 

Nettløysinga til Sunnmøringen har eksistert i fleire år, og har som hovudsak vore open. Vi har i dei siste åra gått over til å tilby fleire lukka saker for våre abonnentar, gjennom det vi kallar pluss-løysingar. I desse sakene har vi moglegheiter for å skrive større saker og å leggje ut video. Biletseriar blir òg i hovudsak presentert som tilbod for abonnentar via pluss-løysinga.

Nesten alle våre abonnentar har registrert seg som SPiD-brukarar, men bruker likevel ikkje løysinga. Gjennom året har vi i redaksjonen hjelpt brukarar som har hatt ulike vanskar med løysinga, men betrakteleg færre enn i 2017. Førespurnader til redaksjonen har i stor grad dreidd seg nettopp om abonnementsspørsmål/SPiD og annonsar. 

Forskjellen i nett-trafikk på opne og lukka saker er påtakeleg, og ganske naturleg. Det er likevel ikkje tilfredsstillande. Utfordringa er framleis å få fleire av våre abonnentar til å bruke pluss-løysingane. I 2018 har vi sett ei gledeleg utvikling på sal av digitale abonnement. Spesielt næringslivssaker sel godt digitalt, men òg eit engasjerande ordskifte.

Facebook er viktig for å merksemd om våre saker, men det er ikkje den einaste plattforma vi spreier våre nettsaker på. Både Sunnmørsposten og dei andre nettavisene i Polaris Media Nordvest er viktige kanalar for å nå breitt ut.

For å halde og drive trafikken på nett, er det viktig å vere «på» ved hendingar. Det kan ein konkret sjå på våre ti mest leste saker–der er det i hovudsak hendingsnyhende som er mest lest, og då primært opne saker. Samfunnsinformasjon som vegstengingar, vassbrot, straumbrot og liknande blir publisert som opne saker. 

Vi har hatt eit differensiert tilbod på nett og i avis i 2018. Saker frå avisa har ikkje blitt publisert på nett, og omvendt. Effekten av dette har vore noko usikker, men redaktøren er framleis av den oppfatning at ein må tilby meirverdi for lesarane ved å synleggjere at komplett-tilbodet er eit tilbod der abonnentane får mest for pengane. Ei differensiert løysing vil òg tene som motivasjon for å få fleire til å nytte SPiD-løysinga som ligg i abonnementa.

Bemanningssituasjonen i Sunnmøringen store delar av året gjorde at arbeidet med konkrete planar for jamn digital publisering stogga opp. Avisa tilsette mot slutten av året to journalistar i redaksjonen, som styrker vår digitale satsing framover.

Mot slutten av 2018 vart det utarbeidd ein digital publiseringsplan, som skal innarbeidast i redaksjonen utover 2019. Denne planen vil sikre ein jamnare flyt av oppdateringar på nettsida gjennom dagen, med 50 prosent lukka saker.